Светскиот ден на остеопорозата – се одбележува на 20 октомври секоја година и кампањата е посветена на подигање на глобалната свест за здравјето на коските и превенцијата, дијагностицирањето и лекувањето на остеопорозата и сродните мускулно-скелетни заболувања.
Остеопорозата значи „порозна коска“. Тоа е состојба каде што коските стануваат тенки и ја губат својата цврстина бидејќи стануваат помалку густи, а нивниот квалитет се намалува. Ова може да доведе до скршеници на коските, што предизвикува болка и инвалидитет. Скршените коски поради остеопороза можат да го променат животот, со сериозно влијание врз квалитетот на животот, мобилноста и независноста. Остеопорозата често се нарекува „тивка болест“ бидејќи повеќето луѓе не знаат дека го имаат нарушувањето сè додека не скршат коска по мал пад или удар (познато како фрактура на кршливост).
Остеопорозата зафаќа над 500 милиони луѓе ширум светот. Во светот, 1 од 3 жени и 1 од 5 мажи на возраст над 50 години ќе претрпат остеопоротична фрактура во преостанатиот живот. Сепак, огромното мнозинство останува недијагностицирано и нелекувано – всушност, до 80% од пациентите кои доживуваат остеопоротична фрактура не се ниту идентификувани ниту третирани за остеопороза. Фрактурите поради остеопороза можат да бидат катастрофални, што доведува до:
- Хронична болка и инвалидитет
- Губење на независноста
- Зголемен ризик од понатамошни фрактури
- Прерана смрт
- Последиците не запираат кај пациентите, семејствата, заедниците и здравствените системи го носат огромниот и скап товар на остеопорозата и сродните фрактури.
Остеопорозата е во голема мера недоволно дијагностицирана и недоволно лекувана. Низ целиот свет, милиони луѓе со висок ризик од скршеници (фрактури) остануваат несвесни за основната тивка болест.
Подготвил: Бранка Крстев, дипл. соц. работник/ Одд.за социјалнa медици, октомври, 2025