Населението во светот живее шест години подолго отколку во 1990-та

Глобалното очекувано траење на живот е зголемено за повеќе од шест години од 1990-та година благодарение на опаѓањето на стапката на смртност од рак и болестите на срцето во богатите земји и подоброто преживување во сиромашните земји од дијареја, туберкулоза и маларија.   

Меѓутоа, во анализа од 2013 Global Burden of Disease (GBD) студијата, здравствените истражувачи велат дека додека очекуваното траење на живот расте скоро секаде во светот, значаен исклучок е супсахарска Африка, каде смртноста од ХИВ/СИДА избришала близу пет години од очекуваното траење на живот од 1990-та година.    

Напредокот кој го гледаме кај различни заболувања и повреди е добар – дури и забележителен – но ние можеме и мораме да направиме и повеќе, - вели Christopher Murray, професор за јавно здравје на Универзитетот во Вашингтон, во САД, кој го водел истражувањето објавено во The Lancet, во декември 2014-та.

Murray вели дека големиот пораст на заедничките активности и финансирањето посветени на потенцијално смртоносните инфективни заболувања, како што е дијарејата, сипаниците, туберкулозата, ХИВ и маларијата имаат суштествено влијание, снижувајќи ја стапката на смртност и продолжувајќи го очекуваното траење на живот.

Но, тој вели дека некои важни хронични заболувања се запоставени, а се зголемува нивната важност како закана за животот, особено кога се работи за растројствата поради употреба на дрога, цирозата на црниот дроб, дијабетот и заболувањата на бубрезите.

Наспроти драматичното опаѓање на детската смртност во последните 23 години, маларијата, дијарејата и респираторните инфекции како пневмонијата, сеуште се првите пет причини за смрт кај децата до пет години во светот, усмртувајќи речиси два милиони деца секоја година.

Друг пример за мешан успех е тоа што, додека во светот смртноста од ХИВ/СИДА опаѓа секоја година од нејзиниот пик во 2005-та, ХИВ/СИДА-та е сеуште најголемата причина за предвремена смрт во 20 од 48 земји во супсахарска Африка.

Подготвил: прим. д-р сци. Весна Спирова

Извор: Lancet, 2014

Related link

Извештај за здравствената состојба и здравствената заштита на населението за 2013 година