БОЛНИЧКИ КАПАЦИТЕТИ ВО ЗДРАВСТВЕНИТЕ УСТАНОВИ НА ТЕРИТОРИЈАТА НА ЦЕНТАРОТ ЗА ЈАВНО ЗДРАВЈЕ СКОПЈЕ ВО ПЕРИОДОТ 2010-2013 ГОДИНА

Болничката здравствена дејност опфаќа дијагностицирање, лекување, здравствена нега, акушерска нега, медицинска рехабилитација и палијативна нега, која заради здравствената состојба на пациентот или видот на интервенцијата не е можно да се врши како специјалистичко-консултативна дејност или во домот на болниот.Болничката здравствена дејност, согласно со мрежата и стручните стандарди, севрши континуирано и со обезбедување на целосен здравствен третман на пациентите.

На територијата на Скопскиот регион, кој го покрива Центарот за јавно здравје Скопје, постои широка мрежа на болнички здравствени установи од видот на универзитетски клиники, клинички болници, специјализирани болници, институти и општи болници, вкупно 43, кои обезбедуваат болничка здравствена заштита за населението од градот Скопје, пошироко за населението од Скопскиот регион, а во доменот на терциерната здравствена заштита за населението од територијата на земјата во целост како и за лица од други држави. 

Обезбеденоста на болничките здравствени установи со лекари во споредба со бројот на постели е под просекот на ЕУ. Сепак, обемот на извршената работа на лекарите е низок според бројот на испишаните болни и остварените болнички денови. Стапката на зафатеност на постелите покажува дека близу една третина од постелните капацитети се празни што упатува од потреба на нивна рационализација во одделни капацитети. Просечното траење на лекување е во рамките на вредностите на просекот на ЕУ што од овој аспект укажува на ефикасно работење на болниците, вкупно. Стапката на хоспитализација покажува низок степен на болничко лекување, што укажува на потреба од подобрување на работењето во примарната здравствена заштита, со што ќе се зголеми бројот на утврдени заболувања за болничко лекување.   link