Светски ден за борба против туберкулозата

– 24 март 2014 -

„Пропуштените” 3 милиони

Секоја година 9 милиони луѓе заболуваат од туберкулоза. 3 милиони луѓе не ја добиваат грижата која им е потребна. Помогнете ни да дојдеме до нив.

Во 2014 година, слоганот на Светскиот ден за борба против туберкулозата гласи „Да дојдеме до 3-те милиони луѓе”.  

 Туберкулозата е излечива болест, но денешните напори не се доволни да се открие, третира и излечи секој оној кој ќе заболи. Една третина од 9-те милиони луѓе кои заболуваат од туберкулоза годишно се „пропуштени” од здравствените системи. Повеќето од овие 3 милиони луѓе живеат во најсиромашните и најранливите заедници во светот или им припаѓаат на маргинализираните групи како што се работниците мигранти, бегалците и внатрешно раселените лица, затворениците, домородното население, етничките малцинства и корисниците на дрога. 

Светскиот ден за борба против туберкулозата заедно го промомовираат СЗО и Партнерството за борба против туберкулозата под заштита на СЗО. Светскиот ден за борба против туберкулозата дава можност, погодените лица и заедниците во кои тие живеат, владите, невладините организации, обезбедувачите на здравствените услуги и меѓународните соработници да се вклучат во понатамошните акции за да им се помогне на 3-те милиони луѓе. Сите соработници можат да помогнат да се постигне оригинален пристап кој ќе му обезбеди на секој оној кој страда од туберкулоза да има достапна можност за дијагностицирање, лечење и излекување.